ఈ బంగారును కాల్చినవి చేతులా ?

కర్కశత్వం కరడు కట్టి..
కొలిమిలో కూనను కాలుస్తోంటే..
కళ్ళు తెరిచి నిద్రిస్తున్న కాకీ..
కొంగ జపం చేస్తోన్న ఖద్దరు..
కొన్నాళ్ళ కి మరిచిపోయే కాలనీలు..
కళ్ళు తెరవాలి.. నోళ్ళు మెదపాలి..
కారిన రక్తం ఇంకకముందే...
కారుతోన్న కన్నీళ్లు చల్లబడకముందే..
ఖూనీకోరుల కీళ్ళు విరిచే...
కొత్త చట్టాలు చేయించాలి...
కాళ్ళూ చేతులూ తీసి..
క్రూరం అనిపించినా..
కాలం చెల్లించాలి..

ఏడవకు తల్లీ... ఎదిరించడం నేర్చుకో !

పాపా నిన్ను ఓదార్చే శక్తి మాకున్నా..
ఎక్కడో ఉన్న చీడ పురుగు మా ధైర్యం పోగొట్టింది !
పనికి రాని నాయకుల రక్షణకు మేమిచ్చెంత ప్రాధాన్యం..
మా ప్రాణాలైన మీకు ఇవ్వలేని అసమర్ధులం !
మా లాంటి వెధవలం ఉన్నంత వరకూ..
నీ రక్షణ భారం నీదే అని చెప్పడానికి సిగ్గు కూడా రావట్లేదు !
నువ్వు మా అంత అయ్యే లోపు ఇంకెన్ని దారుణాలు చూడాలో..
గుండె రాయి చేసుకో ! శక్తి నీది పెంచుకో !
గుంట నక్కలతో, తోడేళ్ళతో, రక్తం మరిగిన పులులతో..
ఎదిరించడం నేర్చుకో ! తప్పించుకోవడం తెలుసుకో !
ఈ లోకంలో ఇంకో దారిలేదు తల్లీ..
మా కాలంలా మీకాలం లేనందుకు మమ్మల్ని క్షమించు !