తన వాటా ఇవ్వలేదని కే వీపీ - వై ఎస్ ఆర్ ను లేపెసారా ?

ఇన్నాళ్ళకు మొట్ట మొదటి సారిగా జగన్ వర్గం వారు పబ్లిక్ గా జలయజ్ఞం లో డబ్బులు తినేసారని ఒప్పుకున్నారు !
 నువ్వింకా చిన్న పిల్లాడివిరా నాయనా,  కొన్నాళ్ళు ఆగితే నిన్ను ముఖ్య మంత్రిని చెయ్యకుండా ఉండలేరు అని సుద్దులు చెప్పిన, కే వీ పీ రామచంద్ర రావుగారిని, ఆయన జగన్మోహన్ రెడ్డి గారి తండ్రి అయిన రాజశేఖర్ రెడ్డి గారి ఆత్మ బంధువని కూడా మరిచి పోయి టార్గెట్ చేయడానికి తయారై పోయారు ! ఆయనకు ఎలాగూ సోనియా పదవి ఇవ్వట్లేదు కాబట్టి ఆయన్ను అనేస్తే పరవాలేదని వారి ధీమా అయి ఉంటుంది !
పనిలో పని గా తాము తిని అరాయించుకొని,  డిల్లీ లో అమ్మ వారి దగ్గర కక్కిన అవినీతికి కే వీ పీ గారిని బాద్యుడిని చేసేసి చేతులు దులిపేసుకున్నారు జగన్ మోహన్ గారి వీరాభిమాని కొండా సురేఖ గారు ! అది చాలదన్నట్లు  వై ఎస్ ఆర్ ను హత్య చేశారనీ, దానికీ బాధ్యుడు కూడా ఆయనే అనీ కూసేసారు !
ఇన్నాళ్ళూ కాంగ్రెస్ లో ఉన్నారు కనక దాని గొప్పదనాన్ని కీర్తిస్తూ, సోనియా అమ్మవారి జపం చేస్తూ ఉన్న కుటుంబం, జగన్ గారు బయటకు రాగానే,  కాంగ్రెస్ పనికిరాని పార్టీ అనీ అస్సలు గాంధీ గారే స్వతత్రం రాంగానే కాంగ్రెస్ ను మూసేద్దాం అన్నారనీ, కాంగ్రెస్ పాలన వల్ల ఆంధ్రుల ఆత్మాభిమానానికి దెబ్బతగులుతోందనీ  సాక్షి వేదికగా వాదించడం చూస్తోంటే  రాజకీయాలు ఎంత దిగ జారిపోయాయా  అని బాధేస్తోంది !
మీ కుటుంబానికి అధికార పీఠం ఇస్తే మంచి పార్టీ  ఇవ్వక పొతే చెడ్డ పార్టీ అన్నమాట ! సోనియా దేవతను మచ్చిక చేసుకోవడానికి వై ఎస్ ఆర్ మరుగు దొడ్డి నుంచి శంషాబాద్ అంతర్జాతీయ విమానాశ్రయం వరకూ ఏ పని మొదలు పెట్టినా అన్నిటికీ తెలుగు వారిని వదిలేసి  రాజీవ్, ఇందిర ల పేర్లు పెడుతున్నప్పుడు వీళ్ళకు గుర్తుకు రాలేదేమో ఈ తెలుగోడి ఆత్మ గౌరవం !
ఇప్పుడు  పార్టీ నుంచి బయటకు వెళ్ళారు కాబట్టి సోనియా మాత,  జల(ధన)యజ్ఞాలలో జరిగిన లొసుగులు బయట పెట్టి వీరి కుటుంబాన్ని తిన్నదంతా కక్కమంటుందేమో అనే భయంతో చేస్తున్న హడావుడి అని అందరికీ తెలిసిందే !
ఇంక వై ఎస్ ఆర్ గారు కే వీ పీ గారిని గుడ్డిగా నమ్మేసి,   పొన్నాలగారితో  కలిసి కేవీపీ ప్రాజెక్టులను పరా పరా మేసేస్తోంటే నోట్లో వేలు పెట్టుకునిచూసేంత అమాయకుడని  మీరు అంటూ ఉంటే నమ్మటానికి, జనం చెవుల్లో కాలీఫ్లవర్లు పెట్టించుకునేంత అమాయకుల్లా కనిపిస్తున్నారా ?
ఇంక వై ఎస్ ఆర్ గారి హత్య జరిగిందనుకుంటే దానికి కే వీ పీ కూడా బాధ్యుడని అనుకుంటే ప్రాణ మిత్రుల మధ్య అంత వైరం ఎప్పుడొచ్చిందో ఎందుకొచ్చిందో కూడా చెప్పి పుణ్యం కట్టుకోండి మరి !  
వాటాలు పంచుకోవడం లో తేడా వచ్చిందా ?  తన వాటా ఇవ్వలేదని కే వీపీ  వై ఎస్ ఆర్ ను లేపెసారా ? ఆయన అంత శక్తి మంతుడా ?
చెప్తే నమ్మేట్లు ఉండాలి సురేఖమ్మా !